கடவுள் இருந்துவிட்டுப் போகட்டுமே !

அது ஒரு அநாதை இல்லம்
யாரோ ஈன்றெடுத்த
குட்டிக் குழந்தையவள்

அதிகாலை வேளையில்...

பத்து பிஞ்சுவிரல்கள் 
ஒன்றுகூடி ஐந்தாகும்

சற்று குனிந்திருக்கும்
அவளது முகத்தில்
இமைகள் மூடப்பட்டிருக்கும்

அவளின் முன்னங்கால்களை
முத்தமிட
நிலம் ஏக்கிக்கொண்டிருக்கும்

அந்த வெண்பாதகங்கள்
தூரத்திலிருந்து பார்க்கும்
பூச்செடிகளைப் பொறாமைப்பட
வைத்துக் கொண்டிருக்கும்

என்ன கேட்க வேண்டுமென்று
கேட்கத்தெரியாத
அந்த மெல்லிதழ்களில் பிறக்கும்
சாமி சாமி என்ற
முனகலிசை காற்றில்
கலந்து கொண்டிருக்கும் 

இத்தனை அழகைப்பார்க்கும்
வரம் கிடைக்கையில்
இல்லை இல்லையென்று
சொல்லும் 
அந்தக் கடவுள்தான்
இருந்துவிட்டுப் போகட்டுமே !

அன்புடன்,
அகல்